Молитвослов - Полный православный молитвослов. На всякую потребу

Твой есмь аз спаси мя, яко оправдании Твоих взысках. Мене ждаша грешницы, погубити мя. Свидения Твоя разумех. Всякия кончины видех конец, широка заповедь Твоя зело. Коль возлюбих закон Твой Господи, весь день поучение мое есть. Паче враг моих умудрил мя еси заповедию Твоею, яко в век моя есть. Паче всех учащих мя разумех, яко свидения Твоя поучение мое есть. Паче старец разумех, яко заповеди Твоя взысках. От всякаго пути лукава, возбраних ногам моим, яко да сохраню словеса Твоя. От судеб Твоих не удалихся, яко Ты законоположил ми еси. Коль сладка гортани моему словеса Твоя; паче меда устом моим. От заповедей Твоих разумех, сего ради возненавидех всяк путь неправды. Светильник ногам моим закон Твой, и свет стезям моим. Кляхся и поставих, сохранити судьбы правды Твоея. Смирихся до зела Господи, живи мя по словеси Твоему. Вольная уст моих благоволи же Господи, и судьбам Твоим научи мя. Душа моя в руку Твоею выну, и закона Твоего не забых. Положиша грешницы сеть мне, и от заповедей Твоих не заблудих. Наследовах свидения Твоя в век, яко радование сердца моего суть. Обратих сердце мое сотворити оправдания Твоя, в век за воздаяние. Законопреступныя возненавидех, закон же Твой возлюбих. Помощник мой и заступник мой еси Ты, на словеса Твоя уповах. Уклонитеся от мене лукавнующии, и испытаю заповеди Бога моего. Заступи мя по словеси Твоему, и жив буду, и не посрами мене от чаяния моего. Помози ми и спасуся, и поучуся во оправданиих Твоих выну. Уничижил еси вся отступающия от оправдании Твоих, яко неправедно помышление их. Преступающия непщевах вся грешныя земли, сего ради возлюбих свидения Твоя. Пригвозди от страха Твоего плоти моя, от судеб бо Твоих убояхся. Сотворих суд и правду, не предаждь мене обидящим мя. Восприими раба Твоего во благо, да не оклеветают мене гордии. Очи мои исчезосте во спасение Твое, и в слово правды Твоея. Сотвори с рабом Твоим по милости Твоей, и судьбам Твоим научи мя. Раб Твой есмь аз, вразуми мя, и научуся свидением Твоим. Время сотворити Господеви, разориша закон Твой. Сего ради возлюбих заповеди Твоя, паче злата и топазия. Сего ради ко всем заповедем Твоим направляхся, всяк путь неправды возненавидех. Дивна свидения Твоя, сего ради испытает я душа моя. Явление словес Твоих просвещает и вразумляет младенца. Уста моя отверзох и превлекох дух, яко заповеди Твоя желах.

Слава, и ныне. Аллилуия, Аллилуия, слава Тебе Боже (трижды). Господи помилуй (трижды). Слава, и ныне.

Призри на мя и помилуй мя, по суду любящих имя Твое. Стопы моя направи по словеси Твоему, и да не одолеет ми всяко беззаконие. Избави мя от клеветы человеческия, и сохраню заповеди Твоя. Лице Твое просвети на раба Твоего, и научи мя оправданием Твоим. Исходища водная изведосте очи мои, понеже не сохраних закон Твой. Праведен еси Господи, и прави суди Твои. Заповеда правду свидения Твоя, и истину зело. Истаяла мя есть жалость Твоя, яко забыша словеса Твоя врази мои. Разжжено слово Твое зело, и раб Твой возлюби е. Юноша аз есмь и уничижен, оправдании Твоих не забых. Правда Твоя правда в век, и закон Твой истина. Скорби и нужды обретоша мя, заповеди Твоя поучение мое. Правда свидения Твоя в век, вразуми мя и жив буду. Возвах всем сердцем моим, услыши мя Господи, оправдании Твоих взыщу. Возвах Ти, спаси мя и сохраню свидения Твоя. Предварих в безгодии и возвах, на словеса Твоя уповах. Предваристе очи мои ко утру, поучитися словесем Твоим. Глас мой услыши Господи, по милости Твоей и по судбе Твоей живи мя. Приближиша гонящии мя беззаконие, от закона же Твоего удалишася. Близ еси Ты Господи, и вси путие Твои истина. Исперва познах от свидении Твоих, яко в век основал я еси. Виждь смирение мое, и изми мя, яко закона Твоего не забых. Суди суд мой, и избави мя, по словеси Твоему живи мя. Далече от грешник спасение, яко оправдании Твоих не взыскаша. Щедроты Твоя многи Господи, по судбе Твоей живи мя. Мнози изгонящии мя и стужающии ми, от свидении Твоих не уклонихся. Видех неразумевающия, и истаях, яко словес Твоих не сохраниша. Виждь, яко заповеди Твоя возлюбих Господи, по милости Твоей живи мя. Начало словес Твоих истина, и в век вся судбы правды Твоея. Князи погнаша мя туне, и от словес Твоих устрашися сердце мое. Возрадуюся аз о словесех Твоих, яко обретаяи корысть многу. Неправду возненавидех, и омерзе ми, закон же Твой возлюбих. Седмицею днем хвалих Тя, о судьбах правды Твоея. Мир мног любящим закон Твой, и несть им соблазны. Чаях спасение Твое Господи, и заповеди Твоя возлюбих. Сохрани душа моя свидения Твоя, и возлюби я зело. Сохраних заповеди Твоя, и свидения Твоя, яко вси путие мои пред Тобою, Господи. Да приближится молитва моя пред Тя Господи, по словеси Твоему вразуми мя. Да внидет прошение мое пред Тя Господи, по словеси Твоему избави мя. Отрыгнут устне мои пение, егда научиши мя оправданием Твоим. Провещает язык мой словеса Твоя, яко вся заповеди Твоя правда. Буди рука Твоя спасти мя, яко заповеди Твоя изволих. Вожделех спасение Твое Господи, и закон Твой поучение мое есть. Жива будет душа моя и восхвалит Тя, и судьбы Твоя помогут мне. Заблудих, яко овча погибшее, взыщи раба Твоего, яко заповеди Твоя не забых. Слава, и ныне, без Аллилуии.

Таже, исповедание православныя веры. Верую во единаго Бога. Трисвятое. И по Отче наш.

Се Жених грядет в полунощи, и блажен раб, его же обрящет бдяща. Недостоин же паки, его же обрящет ленящася. Блюди убо душе моя, да не сном отяготишися и да не смерти предана будеши, и царствия вне затворишися, но воспряни зовущи: свят, свят, свят еси, Боже, Богородицы ради, помилуй нас.

Слава. День он страшныи помышляющи, душе моя побди, вжигающи свещу свою, и маслом просвещающи, не веси бо когда приидет к тебе глас глаголющии: се Жених. Блюди убо, душе моя, да не воздремлеши, и пребудеши вне толкущи, яко пять дев; но бодрено побди, яко да усрящеши Христа милостива, и даст ти чертог божественыя славы Своея.

И ныне. Тебе необоримую стену имуще вернии, и спасения утвержение, Богородице Дево молим: сопротивных советы разори и людей Своих печаль на радость преложи. Мир Свой умири и православных утверди, и о смирении мира молися, яко Ты еси Богородице, упование наше. Господи помилуй (40).

Таже молитва Великаго Василия: Иже на всяко время, и на всяк час, на небеси и на земли, покланяемыи и славимыи, Боже Благии, долготерпеливе и многомилостиве; Иже праведники любя и грешных милуя; Иже всех зовыи ко спасению, обещания ради будущих благ; сам Господи, приими молитвы наша в час сий, и в благости исправи живот наш, к заповедем Твоим. Душа наша освяти, и телеса очисти, помышления исправи, и мысли очисти, разум уцеломудри и истрезви, и избави нас от всякия скорби, зол и болезней, и душевных страстей, и огради нас святыми ангелы Твоими, яко да ополчением их соблюдаеми и наставляеми, достигнем во единство веры, и в разум неприкосновенныя Ти славы, яко благословен еси во веки, аминь.

Таже, Господи помилуй (трижды). Слава, и ныне.

Честнейшую херувим, и славнейшую воистину серафим, без истления Бога Слова рождьшую, сущую Богородицу Тя величаем (поклон). Именем Господним благослови, отче. За молитв святых отец наших, Господи Исусе Христе, Сыне Божии, помилуй нас. Аминь.

Аще есть пост, или кроме поста, егда поем Аллилуия, и творим три поклоны великия, глаголюще молитву святаго Ефрема.

Господи и Владыко животу моему, дух уныния, небрежения, сребролюбия и празднословия, отжени от мене (поклон).

Дух же целомудрия, смирения, терпения и любве, даруй ми рабу Твоему (поклон).

Ей, Господи Царю, даждь ми зрети моя согрешения, и еже не осуждати брата моего, яко благословен еси во веки, аминь (поклон).

И прочих поклонов 12, глаголюще в себе: Господи Исусе Христе, Сыне Божии, помилуй мя грешнаго (дважды с поклонами).

Боже, милостив буди мне грешному (поклон).

Боже, очисти грехи моя и помилуй мя (поклон).

Создавыи мя Господи, помилуй (поклон).

Без числа согреших Господи, прости мя (поклон).

И паки скончав поклоны, глаголем молитву всю выше писаную: Господи, и Владыко животу моему… И поклон един. И по изглаголании молитвы, или по Честнейшую херувим, глаголем сию молитву Великаго Василия: Владыко Боже, Отче Вседержителю, и Господи Сыне Единородныи Исусе Христе, и Святыи Душе, едино Божество, и едина сила, помилуй мя грешнаго, и ими же веси судьбами, спаси мя недостойнаго раба Твоего, яко благословен еси во веки, аминь. Таже, Приидите, поклонимся (трижды). И поклоны три.

Возведох очи мои в горы, отнюдуже приидет помощь моя. Помощь моя от Господа, сотворшаго небо и землю. Не даждь во смятение ноги твоея, ниже воздремлет храняи тя. Се не воздремлет, ни уснет храняи Израиля. Господь сохранит тя, Господь покров Твой на руку десную твою. Во дни солнце не ожжет тебе, ни луна нощию, Господь сохранит тя от всякаго зла, сохранит душу твою Господь. Господь сохранит вхождение твое, и исхождение твое от ныне и до века.